چۆن بزاندرێت منداڵى ساوا کێشە له چاویدا هەیە؟
دکتۆر میران حەسەن دەڵێت: چەند نیشانەیەک هەیە دەریدەخات، لەوانەش وادەردەکەوێت چاوی منداڵەکەت زۆر هەڵبەز و دابەز بکات، وادەردەکەوێت منداڵەکەت بە بەردەوامی سەری لار دەکاتەوە کاتێك سەیری شتەکان دەکات و زۆر گەورەبوون و تەمبوونی ڕەشێنەی چاو، یاخود هەبوونی تەنێکی سپی لە ناو بیلبیلە چاوی.
دکتۆر میران حەسەن، پسپۆڕی نەخۆشییەکانی چاو، لە نووسینێکدا ئاماژە بەوە دەکات، چۆن بزانرێت منداڵى ساوا کێشە له چاویدا هەیە و دەقى نووسینەکەشى بەمجۆرەیە.
چۆن بزانرێت منداڵى ساوا کێشە له چاویدا هەیە؟
یەکەم- هەردوو چاو یان یەك چاوی منداڵەکە دەسووڕێتەوه بەرەو ناوەوە و یاخوود دەرەوه.
دووەم- چاوی منداڵەکەت بەدوای یاری ناکەوێت و تەرکیزی لەسەر جوڵەکەی نییە، که لەبەردەمیدا دەجوڵێت له لایەکەوه بۆ لایەکی دیکە.
سێیەم- وادەردەکەوێت چاوی منداڵەکەت زۆر هەڵبەز و دابەز بکات.
چوارەم- وادەردەکەوێت منداڵەکەت بە بەردەوامی سەری لار دەکاتەوە کاتێك سەیری شتەکان دەکات.
پێنجەم- نیشانەی داخستنی بۆڕییەکانی فرمێسك یان هەوکردنی لەسەر دەردەکەوێت، ئەم نیشانانەش فرمێسکی بەردەوامی لە خۆ دەگرێت لەگەڵ سووربوونەوە و ڕیپۆق کردن، که بۆ چەند ڕۆژێك بەردەوام دەبێت.
شەشەم- هەبوونی هەستیاری زۆر و داخستنی چاو بەرامبەر ڕووناکی.
حەوتەم- زۆر گەورەبوون و تەمبوونی ڕەشێنەی چاو، یاخود هەبوونی تەنێکی سپی لە ناو بیلبیلە چاوی.